HE TUPAPAKU NO TE HAHI.

Kopara, Issue 5, 1 February 1914, Page 3

HE TUPAPAKU NO TE HAHI.

NO nga ra whakamutunga o te Hanuere ka taha nei ka ngaro tetahi o nga tangata tino lawhito o te Hahi Maori, ara aTe Kutia. He tangata aTe Kutia e mohiotia ana i nga rohe katoa o te Tairawhiti, he tangata ngakau mahaki, ohaoha kite tangata, ngakau nui ki tana tnahi i i waenganui i nga Maori. He hanga aroha te taenga mai ote rongo kua ngaro ia hangai tonu tona matenga ki mua tata atu i te wa hei tunga mo te Hinota whiri’whiri Pihopa Hou mo Waiapu itu nei ki Nepia te 22 o nga ra o Hanuere. Nui atu te mamae i pa mai ki ona boa noho tahi, korero tahi, haereere tahi hoki i nga huihuinga Hinota ki Nepia. He Hinota na ka noho tatari tonu ana tamariki ara nga minita Maori kia puta ia; a he hanga rekareka ina puta mai ia he rite tonu te karanga, “ E Kuti! E Kuti! ” I tenei tunga Hinota ka ngaro mete poko hoki tana reo e karanga ana, “ Tena koutou, e aku tamariki! ” Haere, e Koro, haere pai atu i te mea kua pakangatia e koe tau pakanga i tenei ao, haere koe kite okiokinga kua rite noa mai mou.