TE POOTI PIHOPA HOU O WAIAPU.

Kopara, Issue 5, 1 February 1914, Page 2

TE POOTI PIHOPA HOU O WAIAPU.

NO te Take te 22 o nga ra o te Hanuere ka taha nei ka huihui te Hinota Topu o te Pihopatanga o Waiapu nei ki Nepia ko te putake ote hui he pooti Pihopa hou. No te ahiahi o te Taite i te hawhe paahi o te wha ka tu te hui. Nga tangata i tae ki tenei hui e 8g ; e 54 nga Minita, e 35 nga Mangai-reimana. Ko te Atirikona Hapata Wiremu te tangata whakahaere o nga mahi o roto o te Pihopatanga i te wa kahore he Pihopa, ko ia hoki te mangai o te Pihopa i nga wa katoa e ngaro ai te Pihopa, no reira ko ia ano te Tumuaki o tenei Hui. Ka mutu te inoi whakatuwhera a te Tumuaki, me tana panuitanga mai ano hoki i te Raihana whakamanga a te Pihopa Tumuaki o Niu Tireni i a ia hei whakahaere i nga mahi o tenei Pihopatanga,_ ka panuitia mai e Atirikona Ruddock te ripoata a te Komiti i te ahua o nga tangata katoa e whakaingoatia ana he tangata tika mo te turanga Pihopa. Tekau ma ono nga ingoa i korerotia mai e ia me o ratou painga hapanga ranei, me o ratou tohu nunui hoki. Ko te nuinga o aua ingoa no Poihakena. Ka mutu te panuitanga mai o aua ingoa ka whakatuwheratia te hui kite whare ara mo te whakaingoa i nga tangata e tika ana hei Pihopa. Ko te tikanga mehemea kite whakaingoa te minita ite tangata me tautoko rano e tetahi mangai-reimana katahi ano taua ingoa i whakahuatia ra ka waiho hei whiriwhiringa ma te whare, kite kore e tautokotia e tetahi mangai-reimana ka kore noaiho tena whakaingoatanga. Tokoono ano nga tangata i whakaingoatia ara ko enei e whai ake nei o ratou ingoa : 1. Canon Golding Bird. 2. Rev. Langley. 3. Dr. Radford. 4. Canon Sedgewick (Hetiwiki). 5. Bishop Wilson. 6. Atirikona Hapata Wiremu. He mahi nui rawa te pootitanga i enei tangata. Kei te toru o nga whakahokinga i te pooti ka unuhia e te Atirikona Wiremu tona, ka tukuna kia pakanga ana ko nga ingoa e rua

ko to Canon Sedgewick me to Dr. Radford. Ite pooti tuatahi tonu ka kore tetahi hunga tokotoru ara a Rev. Langley, me Pihopa Wirihana me Canon Golding Bird. E rima rawa nga whakahokinga o te pooti katahi ano ka nuku ka tu hoki ko Canon Sedgewick e 29 nga minita i pooti ki a ia, 19 nga mangai-reimana; e25 nga minita i pooti ki a Dr. Radford, 17 nga mangai-reimana. Ko ianei ra to tatou Pihopa hou inaianei e te iwi ko Pihopa Hetiwiki. He pai kia roa tenei tangata ki waenganui i a tatou akuanei pea ka pera ano me tenei kua haere atu nei tokorua hoki raua no te Pihopatanga kotahi ara no Christchurch. Tetahi he pai kia kaha te tinana o tenei tangata hou kia taea ai e ia te mahi nga mahi taumaha o tenei Pihopatanga. Tuatoru ka whai te ngakau kia kaha ia kite whawha ki nga ahuatanga huhua e kaha ai nga mahi ote wahanga Maori ote Hahi i roto i tenei Pihopatanga. Heoi ra waiho hei mahi ma tatou inaianei te inoi mo to tatou Pihopa hou, kia tino whakaritea ia inaianei mo te wa e motuhia ai ia mo te tunga o te tino Hepara, a kia tino whakakiia ia a taua wa kite Wairua Tapu, kia hoatu hoki ki aia te wairua ote mohio o te matauranga, e taea ai e ia te whakahaere nga mahi uaua o tenei Pihopatanga.