Fono Fakatonu He Tau Niue Aukalana

Mana (Auckland), Volume 1, Issue 15, 23 February 1978, Page 7

Fono Fakatonu He Tau Niue Aukalana

Ko e fono he Niue Advisory Council ha Aukalana ne hoko he aho 11 ia Fepuari ne fakamaopoopo ai e tau valavala kupu ne toe he Tohi Fakave ti kua fakafano atu ke he Ofisa Fakatufono (Justice Department) ke kitia po kua hako nakai ke lata mo e tau fakatokaaga he Fakatufono ke he tau tohi pehe na. Kua amaamanaki ni ke liu moua mai e tohi ke tuku ki mua he Fono Lahi ka hoko ai he tapu fakahiku he mahina Aperila. Ko e falu a fekau ne fakatutala ki ai e Fono ko e fifiliaga he tau kotofaaga ke lata mo e ole mai he tau matakau kehekehe ha Aukalana. Ko e matakau Fono Tufono Maaga ha Aukalana (City Council) kua ole mai ke moua taha tagata Niue mo hukui he tau Niue ki loto he taha matakau foou ha lautolu ne kito fakatu he tau nei ko e Auckland Advisory Recreation Council. Ko e tagata ne manako ki ai, ko ia kua aga mo e mahani ke he tau

tauteaga poke fakatokatokaaga he tau mena fiafia fakatinotagata. Hogofulu e higo ne tuku atu he Fono ke he Tohi Kupu mo e Takitaki Fono ke fifili ki ai — ko e tokotolu e fifine ti tokofitu e taane. To fakapuloa atu he tau aho i mua e higoa haana ka toka ki ai e kotofaaga ia. Ko e taha ole mai foki he Grey Lynn Neighbourhood Law Office ke kotofaage he Fono taha mai he tau Niue ke lagomatai atu ke he Komisi Fakatonu (Advisory Committee) ha lautolu. Ko e kotofaaga nei kua lata mo e tagata kua aga mo e mahani ke he fakafehagaiaga fakatagata kamata mai he tau fanau ke hoko ke he tau momotua. Ne pulega e Fono ti talia ai a laua nei ke huhu atu ke he Komisi na ko Solomona Ukamotu mo Betty To-

galea. Tuga ni he iloa e tautolu ko Solomona ne leva lahi e gahua haana he Fakatufono Niue ato fakaoti mai ke he Fakatufono Niu Silani. Ne gahua a ia he Faahi Gahua Fakafili (Justice Dept) hinei ke he kotofaaga leoleo leveki pagota. Ko e tau kua mole ne okioli mai a ia he haana gahuaaga na (retired) ha

kua hokotia e tau magaaho fafati gahua haana. Ko e matua fifine ko Betty Togalea, kua mahani mo e iloa he tokologa ha tautolu a ia mo e haana tau lagomatai ma e tau tagata ha tautolu. Kua amaamanaki ni ke monuina mo e mafola ha laua lagomatai atu ke he Komisi na. NP Ko e kakaano he Ofisa Loea na ha Grey Lynn ke lagomatai atu ki a lautolu e tau tagata kua manako ke moua taha lagomatai faka-loea poke falu a fekau foki kua nakai maeke ke moua e lautolu ha tupe ke totogi aki e tau loea kua fa mahani ke taute e tau fekau pihia. Pehe e kakano he mena ia, kaeke ke fina atu a koe ke kumi lagomatai ke he Ofsia Loea na, to nakai lahi e tupe haau ka mole ke totogi aki e fekau haau ke tuga kaeke ke fano a koe ke he ha loea noa. Ko e matapatu e lagomatai he Ofisa na ki a lautolu po ko mutolu ne nakai lahi e tupe ne moua ke lata mo e tau fekau pihia. Ko mutolu kua manako lagomatai, o atu ke he Ofisa na ne toka he makeu i Lisimoni mo e Hala Hakanoa po ke telefoni atu ki ai numela 769-085 poke 768-509 poke tohi atu ki ai he P.O. Box 78045, Auckland.