Takitaki Pule Foou He Tau Aoga Niue

Mana (Auckland), Volume 1, Issue 15, 23 February 1978, Page 7

Takitaki Pule Foou He Tau Aoga Niue

Kua nava mo e fiafia ha kua iloa mai Niue kua moua tuai e Hafe Vilitama e kotofaaga lahi ko e Takitaki Pule he tau Aoga katoa he motu. Ko e e ia ia he tali mai he mogo ne fakatu ai e tau Aoga Fakatufono i Niue kua moua he tagata Niue e kotofaaga lahi nei ke he faahi gahua fakaakoaga. Ko e mena fa mahani ko e palagi ni ka uta e pu gahua nei. To kamata e gahua ha Vilitama he mahina Me he tau nei.

Tuga mo e iloa e tautolu, na fanau a ia i Mutalau. Ko e 46 ia e tau tau haana moui. Ne fano a ia he Aoga Lotu he tau 1935 ke he 1939. Ti fina atu foki a ia he Aoga Tuatea ke he tolu e tau. Ko e tau 1944 ne moua e ia e kotofaaga Faiaoga ato hoko ke he tau 1956 ne holo hake a ia Ulu Faiaoga ke hoko atu ke he tau 1974 ne moua foki e ia e kotofaaga Ofisa Fakatonu ke he tau fakaakoaga faka/Niue i loto he faahi gahua fakaako he motu. Ko e tau kua mole ne holo hake foki a ia ke he kotofaaga Ofisa Takitaki he Tau Aoga (Education Officer) ato hoko mai ke he mogonei. Tali mai he haana gahua ki loto he faahi gahua fakaako-tama, ne laga loga e hau

haana ke he motu nei ke he tau kotofaaga fakamahani gahua mo e falu fekau foki. Kua mahani lahi foki au mo Vili, ti ko e haaku a talahau ki a ia kua lata tonu ni e kotofaaga nei mo ia ha ko ia ko e tagata kua aga mo e mahani lahi mo e tau fanau mo tautolu foki. Kua eke au mo hukui ha mautolu hinei ma, Vili, ke nava fiafia atu ke he haau a kotofaaga foou. Kua amaamanaki atu ke monuina mo e mafola fiafia haau a nofo ki luga he nofoa tokoluga nei he motu ha tautolu. Monu ti tonu Tagaloa.