TE “HYPOCRITE.”

Pipiwharauroa, Issue 32, 1 October 1900, Page 4

TE “HYPOCRITE.”

He kupu pakeha tenei; kite whakahuatia i te reo Maori ka ahua rite kite “ hipokiriti.” He nui nga whakahuatanga o tenei kupu i roto i te Kawenata Hou he tino kupu e whakahuatia ana e te Karaiti. Te whakamaoritanga i te Paipera he “ tangata tinihanga,” otira kaore i marama, I etahi wa he tangata kino te tangata tinihanga, i etahi wa ehara i te kino, engari he tangata ahuareka ana korero, he tangata puku-kata. Te tinihanga kino ko te teka ko te tahae. Te tino tikanga o tenei kupu o te“ hipokiriti,” he tangata purei i roto i nga tiata, e whakarere ke nei i tona ahua i ana mahi kia rite kite tangata ke, kite tangata e tauiratia ana e ia i roto i te purei; otira i enei ra e kiia ana te tangata e whakapono ana i tona ahua, i te mea kahore nei ona whakapono he “ tangata tinihanga,” ara he “ hipokiriti.” I kiia nga Parihi e te Karaiti he “ hipokiriti.” “ Aue te mate mo koutou, e nga karaipi, e nga Parihi, e te hunga tinihanga —e nga “ hipokiriti! ” e rite ana hoki koutou ki nga urupa kua oti te pani kite paru ma, he mea atahua nei a waho kite titiro atu, ko roto ia ki tonu i nga iwi tupapaku, me nga mea poke katoa. Me koutou ano hoki, ko waho te tika ana ki ta te tangata titiro, ko roto ia e ki ana i te tinihanga, i te “hipokiriti”— i te kino.” ( Matiu xxiii. 27, 28.) Na kua marama te tikanga o ta tatou kupu i te kupu whakarite a te Karaiti mo te urupa, ko waho nei i whakapaipaitia, ko roto ia he kino, he pirau ; he penei ano te “ hipokiriti.” Te tikanga o tenei kupu o te “ parihi,” he tangata e wehe ana i a ia kei piri ki etahi tangata, kite whakaaro hoki a te Parihi ko ia he tangata tapu ko etahi atu he hara katoa. I te haerenga o te Parihi raua ko te pupirikana kite temepara kite inoi, wehe ana te Parihi i a ia, “ tu ana te Parihi ko ia anake.” I nga kauwhau a te Karaiti kaha atu tona kino ki nga Parihi, i whakaaturia e ia a ratou mahi tinihanga. I mea nga Parihi he hunga tapu ratou, otira ko a ratou mahi kino atu. He tahae ta ratou mahi, he tukino i nga pouaru. I nui ke atu te riri a te Karaiti ki a ratou i tana riri ki nga tangata e tino mohiotia ana he hunga hara. I tino kino atu te wehenga o nga Parihi i nga ra i a te Karaiti, otira kei pohehe tatou he kino katoa tenei iwi te Parihi. He tino tangata etahi Parihi he Parihi a Nikorima, a Paora. He tangata te “ hipokiriti ” e kinongia ana e te pakeha, e nga pakeha pai, e nga pakeha

kino, e tino weriweringia ana. Ki taku titiro ka whakapono ake ana te pakeha tino whakapono atu, ka kore ake ana e whakapono nui atu te wehi ki nga mahi whakapono. Engari ra he nui ano te “ hipokiriti ” o roto o te pakeha, te iwi na ratou ta ratou na kupu te “hipokiriti.” I nga kainga maori e kiia nei he kainga whakapono, ki taku whakaaro nui atu te “hipokiriti.” He tino reo no te Maori te Karaipiture, takoto noa iho nga kupu Karaipiture, otira ko nga mahi etu ke ana. E tangi ana te pere ite ata i te ahiahi, otira e haere tonu ana te puremu, te haurangi, te korero kino, me era atu tini mahi. Ka karangatia he hui kawanga whare-karakia, hei muri iho ka timata te haurangi o tangata whenua, kaore e manaakitia te whare-karakia. Ka haere nga mangai reimana ki nga hui karakia, i te hokinga kite kainga kei nga mahi ote ao. Ite Ratapu ka haere te tangata kite kai hapa, ite Mane kei te paparakauta e parori ana. I tino kite ahau i tenei. Otira kahore au ite mea he penei nga tangata katca. Te Atua e whakaae kia mahi rua te tangata kia mahi ki a la i tetahi wa, a kia mahi kite rewera i tetahi wa. Kaore he hawhe whakapono kite Atua. E rua wehenga o nga tangata katoa o te ao, kei te maramatanga kei te pouritanga ranei, kei te ora kei te mate ranei, kei roto o te rangatiratanga o te rangi, kei waho ranei, mo te rangi mo te reinga ranei, kei ate Karaiti kei te rewera ranei. “ Kahore he tangata e pono te mahi ki nga rangatira tokorua.” (Matiu vi. 24.) “Na te tangata e hiahia ana kia meinga hei hoa aroha mo te ao, ka meinga ia he hoa riri kite Atua.” (Hem. i y - 4-) _ “Te tangata ehara ite hoa noku, he hoa riri ia ki a au; te tangata kahore e kohikohi tahi maua, e titaritari ana.” (Mat. xii 30.) “ Kia pehea te roa o ta koutou tahuritanga ki nga tikanga e rua ? Kite mea ko Ihowa te Atua, me whai ki a ia; aki te mea ko Paara me whai ki a ia.” (1 Kingi xviii. 21.) He rarangi whakamutunga ko te kupu a Hohua kite whanau a Iharaira iaia ka tata te mate, “A, kite mea e kino ana ki ta koutou whakaaro te mahi ki a Ihowa, ma koutou e whiriwhiri aianei me mahi koutou ki a wai ko au ia me toku whare ka mahi matou ki a Ihowa.” (Hohua xxiv. 15.) E te iwi ma tatou e tango mai enei kupu ki a tatou. Mehemea ko te Karaiti kia moturere ki a la, mehemea ko Hatana kia moturere ki a ia. Kahore he hawhe whakapono kite Atua.