Te Kura ki Kirikiriroa

Muka, Volume 10, Issue 4, 1 September 1997, Page 7

Te Kura ki Kirikiriroa

N ā Tīmoti

Poke mai ana, mui mai ana, poi mai ana a tipatere kite kura tuatoru ote tau, kite marae o Kirikiriroa i te taone o Kirikiriroa. Katahi ano pea ka penei te tokomaha o te hunga hui maineke atu i tona 200 nei.

Na runga i tenei ahua ka pa ano ona raruraru, ara, ko te nui rawa o ia ropu. He nui te hunga i ki he nui rawa nga ropu, a, hemanawa ana tera te noho.

I tua atu i te tokomaha i tono ano etahi kia ata tirohia ano te taha whakaropu kia noho ai ko tino matatau ki a tino matatau, ko ahua mohio ki a ahua mohio, a, ko autaia ki a autaia. Ka ahua hongehongea ano a matatau kia whakanohoia mai ki waenga o autaia, a autaia ranei ki waenga o matatau. He tono tenei e ata tirohia ana ano e matou.

Na te mea ko te putea awhina mai i te kaupapa a Te Tahuhu o Te Matauranga kua whakaritea ki tetahi atu wahanga o nga mahi a Te Tahuhu i noho te kura kite matapaki ae ranei me haere tonu te kaupapa me waiho ranei tenei hei kura whakamutunga i te korenga o te putea ake a Te Taura Whiri e ahei mana anake te kaupapa e pikau.

Tutu ana te puehu, ru ana nga pihi o te ikapahitanga, a, kotahi ana te whakatau me haere tonu nga kura ahakoa ma ratou ano ratou e utu. I tua atu i tenei whakatau i puta ano te korero me poke Te Tahuhu me nga mema Maori kite reta hei whakaatu atu ite riri o te kura.

Kaore te kura i te ki me tango mai ano taua putea i whakaritea ra ki wahi ke engari ia me whakarite putea motuhake mo nga kura nei.

Kati, i haere te kura, a, ahakoa te nui rawa i tutuki i runga i te tino pai, a, me pehea ke atu hoki ko Kirikiriroa ke ra hoki te marae? E kore rawa atu e katata te ea o te manaaki, o te whakaute a Kirikiriroa Marae i te kupu engari kei hea ke atu i te kupu? Na reira ka hoki ano te korero, e nga tohunga o te manaaki, i ranea ai a kai, i puta ai a wanea, i tau ai a mauri, tena rawa atu ra koutou.

Na, hei a koutou, hei te hunga haere mai ki nga kura nei he take hei ata whakaaro ma koutou: 1. katoa e haere mai ana kite kura i Waimarama me utu, a, ko te utu kua whakaritea ko te 200 tara mo ia pakeke, 50 tara mo ia tamaiti. 2. ko te reo o te hui ko te reo Maori, ehara i te hui reo Pakeha. Mehemea e uaua ana te u kite reo Maori he pai ke ake te kore e haere mai i te haere mai ki reira whakataunahua ai i te hunga e u ana. Kati hoki te tino pohehe ma te kaha kite korero Pakeha ka pai te mohio kite korero Maori. 3. ko nga ra o te hui ki Waimarama ko te 18-23 o Kohi-tatea 1998, a, ko te 3 o nga haora o te ahiahi te wa whakaeke. 4. na ko te hunga e whakaaro ana kite haere mai ki

Waimarama me tae mai 6 koutou ingoa me a koutou moni ki konei, ki Te Taura Whiri, i mua mai o te 18 o Hakihea kia taea ai te marae te whakamohio tokohia e haere atu ana, kia taea ranei te whakatau me whakakore i te mea he tokoiti rawa kua tono. Kia tino maumahara ko koutou, ko matou ke kei te pikau i nga raru o tenei kura na reira e penei nei te kaha ota matou aki. Ki te tae mai hoki nga tono i te ra i whakaritea kua taea e Wareko te wahi ki a ia i runga i te mahea, kaua i te ponana. Mana e whakau te wahi ki to tono i roto i te rua wiki i mua mai i te Kirihimete.

5. kite pa he raru ki a koe e kore ai koe e ahei kite haere mai kia wawe tonu te whakamohio mai, kaua e waiho kia eke tonu kite wa whakamohio mai ai. 6. ko te tokomaha e whaia ana kia kaua e tokoiti iho i te 60 a, kia kaua e neke atu i te 120. 7. kia tino marama mai kei te whaia ko te hunga kua maro ke te haere ote reo. Katoa nga mahi ka whakahangaitia ki taua momo tangata. 8. kaua e ware ware ko te ra kati ai nga tono ko te 18 o Hakihea.

Koutou, tatou i hui nei ki Kirikiriroa i puta ai a huatau kia mohiotia ai to tena whakaaro, to tena whakaaro, tena koutou katoa engari ko te take kia tino maumahara tatou ehara tenei kura i te kura ako haka, ako moteatea, ako karanga, ako tikanga, ako whakapapa, ako whaikorero ranei engari ia he kura reo, he kura whakawhanui ite mohio kite kupu, he kura whakatika i te takoto o te kupu. Kia oti pai i a tatou enei ka tiro ai ki era o runga atu ra.

Katoa nga mahi e whakau ana i te ahua o te whakamahi ite kupu me ona rerenga katoa. Whaia ko tera kia eke panuku ka whai atu ai ko etahi atu ahuatanga na te mea kite uko tenei ki tona uranga tika ka mama noa iho

era atu ra

Kati, e tatou ma, kia ora ano tatou katoa i roto i ta tatou whai, i ta tatou whakamomori kia mau, kia ora tonu to tatou reo haere ake nei, haere ake nei.