HE “REO AHUREO” MĀORI

Muka, Volume 6, Issue 1, 1 January 1993, Page 9

HE “REO AHUREO” M Ā ORI

No na tata ake nei tau mai ai te urupounamu: “He aha ra nga whakaaro o te Taura Whiri mo te ata whakatomokia atu o te reo Pakeha ki roto i nga kura kaupapa Maori?” Anei ta te Taura Whiri whakautu.

Tuatahi, kia mau ko te reo Maori anake hei reo whakaako. Kaua rawa ma te reo Pakeha e tu whakahihi ai i roto i nga whakahaere o te kura. Engari, ara atu ano tetahi huarahi e waia ai, e matatau ai nga tamariki kite reo Pakeha. Ara, ko te whakaako ite reo Pakeha kite reo Maori and.

Ka mutu, kei te mohio tonu matou e tutuki pai ai tenei wawata, me matua matatau nga kaiwhakaako ki tetahi “reo ahureo” Maori e taea ai nga ture apiti kupu Pakeha te whakamarama atu. Kaua pea ko nga kupu riraparapa katoa a nga matanga wetewete reo, engari ia ko nga kupu e hangai ana kite hohonutanga o te punareo kei reira nei nga tamariki e rukuruku haere ana.

He wa ano pea me penei hoki te hapaitia ake o te reo Maori i roto i nga mahi o te kura. Ehara rawa ma konei e rangona ai te ataahua, te tiketike, te ngoto o te reo Maori, otira he pai noa iho pea hei whakapirata, hei whakakoi ake i te reo o te tamaiti.

Kati, anei ta te Taura Whiri i kite ai, i whakaemi ai hei reo ahureo Maori. Ehara i a matou ake te katoa. Ina hoki kei ta Cleave Barlow whakamaoritanga o ta Bruce Biggs “Let’s Learn Maori’ te nuinga e takoto ana, a, no wahi ke pea etahi atu.

Ko ta tenei kohinga, he tautawhi, he awhina i te kaupapa e takakawea nei e nga kura kaupapa Maori. Tera pea he pai ke atu kia whakamahia ko a Cleave anake, na te mea ko ana kua whakapukapukangia. Heoi and, he tauira noa iho tenei ma te hunga whakaako.