REV. MOHI TUREI.

Kopara, Issue 7, 1 April 1914, Page 3

REV. MOHI TUREI.

NO te 2 o Maehe nei ka moe a Mohi Turei, Minita, ki Rangitukia, eBS ona tau. Ite taenga tuatahi oTe Wiremu Parata ki Rangitukia i a Hanuere, 1834, he tamariki ia, e ono pea ona tau. Taua haere oTe Wiremu he whakahoki kite kainga ia Te Rukuata ma, i kahakina ra ki Peiwhairangi i runga i te kaipuke patu weera. Ko te hokinga hoki tera ki tona iwi o Tamatakura kua riro herehere i mua ra i a Ngapuhi. Katahi hoki a Ngatiporou ka rongo ki etahi o nga kupu ote Rongo-pai. I muri mai ko nga kai-whakaako i whakanohoia eTe Wiremu tuakana ki Waiapu. Na konei a Turei i matau ai ki nga korero mo te ora e ahu mai nei i a Ihu Karaiti. Pakeke rawa ake kua iriiria eTe Wiremu, kua whakaukia hoki eTe Herewini Pihopa. Ite mea kua tu ko Te Wiremu hei Pihopa mo tenei wahi ka tae a Mohi kite Kareti i Waerengaahika, a, i te tau 1864 ka whakapakia hei rikona, ka whakahokia ano ki Rangitukia hei hoa mahi mo Rev. Raniera Kawhia ki nga kainga o Ngatiporou; ko Rev. Rota Waitoa i taua wa te Minita o Tuwhakairiora. No te tau 1870 ka whakapakia hei piriti, ka wehea hoki a Ngatiporou, ko tetahi wahi ki a Rev. Raniera Kawhia, ko tetahi wahi ki a Rev. Mohi Turei. Ite putanga o te ako porangi a te Hauhau kite tai rawhiti, uaua tonu a Mohi ratou ko ona hoa minita kite pehi. Ite tau 1884 ka puta ano tetahi ako rere he, ko ta te Momona, mete kaha ano a Mohi kite riri atu, kite tohutohu hoki i tona iwi kia kaua e whakarongo atu, he mahara nona ki tana oati “ kia whakaputaia te uaua i nga wa katoa kite pana, kite pei atu i nga ako pohehe katoa, i nga mea ahua ke, kahore nei e rite ki ta te Atua kupu.” Ite tau 1904 kua pa te mate whakaiwikore ki ona waewae i mutu ai tona haereere ki etahi wahi, i takoto tonu ai ki tona whare. Ko te roro ia ote upoko, he nui te ora, he kaha hoki tana whakaputa kupu ki nga tangata e tae ana kia kite i a ia; mau tonu hoki tona whakapono ki a Ihu Karaiti hei Kai-whakaora mona, ahakoa ngaua tonutia e te mamae. Heoi kua tutuki tenei kite aroaro o tona Kaiwhakaora, kite wahi kahore nei e taea e te mamae, e te pouri.