Polenesia mai Aukilani i Apia

Mana (Auckland), Volume 1, Issue 15, 23 February 1978, Page 5

Polenesia mai Aukilani i Apia

I le po o le Aso Tofi o le vaiaso na te’a nei, aso 16 o Fepuari, sa faia ai se ta’umafataga fiafia tele i le Trilo, i le tatalaina o femalaga’iga a le va’alele o le Polenesia mai Aukilani i Apia. Sa fa’atumulia lea po i le mamalu o lo tatou atunu’u, sui mai le male o Niu Sila, fa’apea fo’i ma sui mai isi Kamupani va’alele. O le susuga a le ali’i pule o le Kamupani a le Polenesia o Mr Terrens Beatham sa saunoa e fa’afeiloa’i le ’au vala’aulia Ina ua ’uma ona saunoa le susuga a Mr Beatham, ona vala’aulia fa’aaloalo lea o le Afioga a le Konesula a lo tatou Malo, le Afioga a Vaimasanu’u Niko ’ Apa e saunoa e fai ma sui o le Malo o Samoa. Ina ua mae’a ia saunoaga, ona alo atu le i le taumafataga tele lava ma le matagofie. Soso’o ai loa lea ma fa’afiafiaga. O pese fa’a Samoa moni sa usuina e tama’ita’i o le Yandall Sisters. O le mea sa sili ona mata’ina e tagata sa ’auai i lea po, ona o se tasi o Tina o le atunu’u, o le tama’ita’i lauiloa lea o Aggie Grey, ina ua sa’asa’a i le siva Samoa. O se po fiafia ma le matagofie lea po. Tau ia ina ia manuia le gasologa o taumafaiga a lenei atina’e mo se manuia o lo tatou atunu’u o Samoa.