Untitled

Aotearoa : he Nupepa ma nga Tangata Maori, Volume I, Issue 1, 4 June 1892, Page 3

Ko Te Karimena e tu ana ano hei Minita mo te taha Maori, ahakoa kua whakarereketia nga tunga o nga Minita o te Kawanatanga, ko te taha ki te taha Maori kua wehea. Ko Te Karimena kua whakaturia hei Minita mo te taha ki nga Kooti Whenua Maori, ko aua Kooti kei raro i tona mana

Ko Timi Kara tena e riro mana nga mahi mo te taha ki te taha Maori, ka waiho mana tena mahi, mo te taha ki te Tari hoko i nga Whenua Maori, ka riro tena ki raro i te mana o Makenehi te Minita mo nga Whenua. Tena pea e kitea tetahi raruraru mo te whakahaere i nga mahi mo te taha Maori, engari, e kore e roa kua tikatika haere tena taha. Engari e kitea ana me whakatu ano etahi tangata, ahokoa kia, he poori he Komiti ranei hei whakahaere mo te taha ki te Iwi Maori, he maha nga mea hei mahinga, hei tirohanga, a he maha nga mea hei whakatika-

tikatanga ko ana mahi kei waho atu o to kaha o te tangata kotahi. Ko taua Komiti me whakatu mo te taha ki nga Maori, me te Kawanatanga hoki, ko te mahi ma taua Poon Komiti ranei hei whakakaha i te Iwi Maori kia kite ai ratou i nga mea e tika ana hei whakaako ia ratou. E kore e tika kia mahia aua mea me ke atu ano i nga Maori kia uru mai ki roto i aua mahi, a kia whai-mana ki te mahi i raro i nga tikanga o te Ture, ma taua Komiti e whiriwhiri nga Pitihana e tukuna ana ki te Paremata, a me te whakaatu i a ratou whakaaro ki te Kawanatanga, no te mea kaore e ahei i nga Komiti o te Paremata te mahi i nga mahi mo te taha ki te Iwi Maori, no reira ka mate ko te Iwi Maori. Ko Tawhiao kua whakaae ki te tango penihana mai i te Kawanatanga, Ko tenei me titiro atu e tatou, ko te mutunga tenei o te Kingitanga a ko ake nei, ko te Maori kua kotahi ki te Pakeha, a ko tenei, me matakitaki atu ki nga painga, ki nga kinonga ranei o tenei. A, ahakoa pewhea ranei pewhea ranei nga mahara, heoi kua timata te mahi, ko tenei kua kotahi nga Iwi e rua, ma nga kai-arahi o nga tangata Maori, e kite i te taumaha kua tau ki runga i a ratou ko nga kaumatua me nga tamariki, ka titiro atu kia ratou hei arahi i a ratou. Ko te hui ka tu nei ki Hehitingi e hapai i nga tikanga kua whakatakotoria e te tama a Potatau. Ko te Kingitanga e whakatete ana ki te Kawanatanga o te Koroni. Mehemea i ahei te whakahinga i nga Pakeha me te pana atu i a ratou ki waho o tenei motu, kua ara taua tikanga. Engari kaore i kaha ki te pera. Engari he maha ano nga tangata Maori i piri kia Te Kuini, he tangata penei me Tamati Waka Nene i nga wa o mua. a, penei hoki me Meiha Kaepa, me Meiha Rapata, me Renata Kawepo, me Karauria, me Ihaka Whanga. me Pitiera Kopu, me etahi atu i te whawhai o Waikato, a i muri mai ko te whawhai a te Hauhau i arahi nei i o ratou tangata ki te whawhai ki o ratou Iwi ano. Mehemea i piri tonu nga tangata Maori i nga wa o mua ki te whawhai ki nga Pakeha, ko tenei Motu ko Nui Tireni, kei a ratou ano i tenei ra. Engari ko taua ra kua hori, he maumau kl te tangi ki te miraka kua maringi. Ko tenei me piri nga Maori ki nga Pakeha, me mahi tahi raua, ko nga ritenga o nga Maori tawhito kua totohu. Engari me whakaara he mea hou ki te hui ka tu nei ki Hehitingi, he mea kaha atu i te mea tawhito. ko te tikanga hou kia kaha, kia whanui, kia penei ai me nga tima nunui a te Pakeha, he kaha atu anake ki te ngaru, mete te tere haere ki tona tauranga kawe ai i ana pahihi, me ona utanga.