He Poroporoaki ki a Wiremu Parker

Tu Tangata, Issue 33, 1 December 1986, Page 17

He Poroporoaki ki a Wiremu Parker

Kua hinga tetahi o nga o Aotearoa te tohunga whaka-iri korero ki runga i nga marae, i rangona ai te ngako o te reo Maori. Kua tau mai kite tihi o Hikurangi maunga te kapua pouri. Koia nei kei te riringi i nga roimata ki a Hine-nui te po. Kei te tangi tikapa nga au o Waiapu awa e kawe nei o tatou mate ki Hawaiki nui, Hawaiki roa, Hawaiki pamamao. Kua wahangu te manu tioriori o te reo Irirangi. I tona wa koia te waha ki o te motu, te tangata panui i nga mamaetanga o nga waka tae atu ki nga mahi whakahirahira, whaka hari koakoa i te ngakau. I tenei ra ka hoki nga mahara ki a Tumatauenga, tenei te tangata whakapaoho i a koutou mahi i te muranga o te ahi. Inaianei kua whai atu ia i a koutou. Kua riro te ahorangi o te Whare Wananga o Wikitoria, te pou o te matauranga, te tangata mo nanahi tonu nei i kakahuria ai kite tohu Takuta o nga Tuhituhinga, te kaumatua o Te Herenga Waka marae, te kaiako o nga tauira. Kua noho mokemoke te whanau, ana

tamariki, ana mokopuna, tana hoa rangatira o roto o Whanganui awa. Kua wheturangitia tenei rangatira kua rere amiomio kite rangi titiro mai ai kite hunga kua mahue mai i a ia. E koro Wiremu, haere ra ki o pari karangaranga, ki o hapu, ki to iwi. Haere, mene atu koutou ki a kui ma ki a koro ma. Whakahuihui koutou kite wehenga atu ote tangata, kite tini, ki te mano. Ka tokia to kiri kite anu matao, a, i tenei ra kua takoto mai koe ki runga i te atamira o te mate, i huri ai to kanohi ki tua o te arai. Tenei matou o whanaunga o karanga maha, o hoa mahi e tangi atu nei ki a koe. E taku hei piripiri, taku hei mokemoke, taku kati taramea, taku kohatu turua, taku kawau aroarotea haere, haere, haere. Kua riro atu koe i te tai ata, waiho mai matou kite tai ahiahi whai atu ai. No reira e koro, e te matua, e te hoa haere, haere, haere. Hirini Moko Te Miiri (Prof. Hirini Mead).