Poroporoaki

Tu Tangata, Issue 13, 1 August 1983, Page 27

Poroporoaki

Te Wiki Popata

“Maringiringi ana he roimata Me he wai e tarere

Mou e te kotuku whakaata Te tuari a te iwi”

No te ono o nga ra o Mei ka mate tetahi kaumatua morehu o te hiku o te Ika, a Te Wiki Popata. Ona tau warn tekau ma rua. He uri ia no nga tupuna maha o runga i nga waka i a Tinana, i a Kurahaupo, i a Te Mamaru.

Kua mureia rawatia te whare korero, mokemoke ana nga marae. Miniti ana nga puna roimata i roto i ona iwi i a Ngai Takoto, i a Patukoraha, i a Te Paatu.

He tangata tenei i pupuri i nga taonga tuku iho o te Ao tawhito. He Pu-korero i roto i nga whare hui o te hiku o te Ika puta noa. He putea o nga mahara, o nga kupu waiho ake.

He pou hoki ia i roto i tona Hahi Mihinaere, nana te whakapono me ona ahuatanga katoa i hapai. He aroha, he pai, he ngakau whakaiti taana i ahuareka ai.

I nui rawa ai tenei koroheke i roto i te rangatahi. Whakapaua e ia tona hinengaro katoa kite whakaako i te rangatahi. Kia taea ai ratou te whakakapi i nga whawharua i te kowhera kau, hei, mauranga-a-ringa i nga ra e tu mai nei.

Haere i runga i nga maunga korero a o matua tupuna e puehutia nei i te kopu o te whenua. Takahia e koe nga tapuwae o o taua wheinga, he haerenga, he rukunga no ratou ma ki raro i nga rimurimu e naueue i raro o Haumu.

Haere i runga i o waka. Kua rewa atu to waka, na roto atu i to moana i Rangaunu, roto atu i ona tai. He tai mihi tangata, he tai mate, puhakehake mai, whakahekeheke ra. Haere e te Poutokomanawa o te Hahi, whakawhiti atu i te pouritanga kite maramatanga, ite mate kite ora. Haere oti atu e kara! Pai ana a te wa e tutaki ano taua i tera Ao. “I puta tahanga te tangata i te kopu a tona whaea, aa ka hoki tahanga atu ano. Na Ihowa i homai, na Ihowa i tango, kia whakapaingia te ingoa o Ihowa.” Ka huri.