TE AITUA I OPOUTAMA

Toa Takitini, Issue 100, 1 December 1929, Page 1933

TE AITUA I OPOUTAMA

No nga marama timatanga o te tau nei i mate ai tetahi tangata i roto i nga mahi kawanatanga i Opoutama, i horoa e te kohatu i roto i te ‘koare.’ Ko taua tangata nei ko Paraone te ingoa no Heretaunga nei i haere ki nga mahi kawanatanga ka pa nei ki tenei aitua. Kaati he nui te roa o te wa i whakahaere ai te ahuatanga mo tona wahine me a raua tamariki, ara kia whai whakaaro te kawanatanga. Kaati i runga i te kaha mete manawanui o Bob. Tutaki kite whakahaere i taua tono i runga i tona turanga mangai mo te hunga mahi, ka puta te mahara a te kawanatanga kotahi mano pauna (£1000) ma taua pouaru me ona tamariki. Kanui te whakamihi o Te Toa mo tenei ahuatanga. E kui koutou ko tatou tamariki. Kia kaha ki to koutou rangatiratanga i roto i tena aitua. Kua mate to koutou matua, me ara

ake hoki i roto i a korua tamariki he ‘Tetekura’ waimarie ake i to tane kua wehe atu i runga i tena huarahi he. E whakaatu ana tenei i te pai o te whakaropu haere i a tatou i tena wahi i tena wahi ahakoa he aha te iwi, te hapu, te haahi, nga whakapapa ranei, na reira e nga Toa Takitini, e nga kai korero o to koutou pepa, tohaina enei tu ahuatanga ki o tatou marae maha, a ka awhina mai i tenei o koutou pa-tu-watawata hei reo hei mokai pikau mo a koutou whakaaro maha mo nga tikanga e piki ake ai te iwi kite maramatanga ara rawa ia mo Te Whakapono.