TE KARAKIA WHAKATAPU MO TE PIHOPA.

Toa Takitini, Issue 87, 1 November 1928, Page 868

TE KARAKIA WHAKATAPU MO TE PIHOPA.

He whakaatu ano tenei kei te 2 o nga ra o Tihema nei le karakia whakawahi ito tatou Pihopa, ki te Whare-karakia nui i Nepia (Cathedral) ka timata te karakia i te 11 o nga haora i te ata. Ka tae katoa mai nga Pihopa o Nui Tireni ki tana karakia. Ko te kauwhau kei a Hapata Wiremu, a ka reo rua tana kauwhau, pakeha Maori. E 550 nga nohanga i roto i te whare-karakia kua rite mo nga Maori, a pera ano hoki te rahi o nga nohanga kua rahuitia mo nga pakeha, ara ko te hawhe tonu o te whare ki nga Maori, ko tetahi hawhe ki nga pakeha. Kua whakaritea ma te tikiti rawa ka uru ai te tangata ki te Whare-karakia. Kaore he utu mo te tikiti, engari i peratia ai kei pokea nga nohanga e te tangata, pakeha, Maori, a ka mahue te iwi i haere mai i nga whenua tawhiti i te kore waahi watea mo ratou. Kua tae mai nga whakaatu kei te haere katoa mai nga minita o te Pihopatanga o Waikato, me nga minita ote Pihopatanga o Poneke. Ko etahi o to Akarana Pihopatanga e kore e puta mai. (Kua whakaaturia te taumaha o te tikiti hei utunga ma te minita mai i raro atu o Akarana ki Nepia ara kei te £7 kite £8) . Haunga hoki nga minita o tenei Pihopatanga o Waiapu, kei te haere katoa m|ai ratou. Kei te haere mai hoki a Ta Apirana Ngata me te ope rangatira o roto o Ngati Porou, ahu mai nei ki o tatou rangatira o roto o Turanga, tae mai ki Te Wairoa. Kua tae m,ai hoki te whakaatu tera e tae kite 50, neke atu ranei, te ope o TeArawa. Te Marae: Kua rite a Te Pakipaki hei marae nohanga mo nga manuhiri. Ko Hori Tupaea te tiamana o te komiti hei tiaki ite marae. Kia mahara ano ra e nga manuhiri ki te mau mai i o koutou karukaru, kaore hoki he puia o tenei wahi hei whakamahana i a koutou. Nga tereina. Kua whakaae te kawanatanga kia tu te ekeperehi (express) tereina i Te Pakipaki a te Hatarei te 1 o nga ra o Tihema, kia tuku iho ai nga manuhiri i reira.

I te Ratapu ka rere atu he tereina (special) i Te Pakipaki i te 9.15 a.m. ki Nepia, a ka hoki ano ki Te Pakipaki i te rautunga o te karakia. Ko te utu mo te tikiti 1/9 return. Powhiri. Kaore he powhiri i tukutukuna ki a wai tangata ki a wai tangata, i te wehi kei mahue etahi, a ka waiho hei take whakapouri. No reira ko te tangata e whakaaro nui ana ki tenei taonga, haere mai, haere mai kite manaaki i te ra i tirohia ai e te Atua tatou te iwi Maori. Ko nga ohaoha katoa o tenei ra e tapaea ana mo nga main a te Hahi i roto i te iwi Maori.