TE PIHOPATANGA MAORI.

Toa Takitini, Issue 54, 1 February 1926, Page 346

TE PIHOPATANGA MAORI.

Na te Etita. KAORE ano kia rangona he kupu hou mo to tatou pihopatanga Maori. Ano kei te takoto te iwi, kei te whakaaro. He pai mehemea kei te pera katoa o tatou pariha. Otira kia auau ano te whakaohoolio a nga minita i o tatou iwi, kei tukuna te take nei kia moe. He taonga nui, he taonga tapu. he taonga hei tuku atu ki nga tamariki, ki nga mokopuna i muri i a tatou. Noreira kia kaha te whiriwhiri i ona hohonutanga, i ona teiteitanga, i ona whanuitanga. Kotahi tonu te take nana i whakauaua to tatou pihopatanga, ko te hiahia o nga pihopa tokotoru o Aotearoa nei (Te Atipihopa, te Pihopa o Waiapu mete Pihopa o Poneke) me pakeha te pihopa tuatahi mo te iwi Maori. Kaore i kitea atu e matou, e o koutou Mangai, he huarahi e ngawari mai ai nga pihopa nei kite hiahia o te iwi Maori, hei te Maori ano te pihopa tuatahi. I mau tonu mai nga Pihopa ki ta ratou na kupu. me pakeha; i mau tonu hoki nga Maori ki ta ratou, me Maori, Ka kite mai koutou te iwi ko te take nei ka uaua. E kore pea nga Pihopa nei e whakangawari i ta ratou tohe. He pai mehemea ka taea te whakangawari o te whakaaro ote iwi Maori. Kite whakauaua tahi nga taha e rua, he aha ra ton a mutunga? Kite whakaaetia te tohe a nga Pihopa ka whiwhi tatou ki to tatou Pihopatanga motuhake i enei marama tata e takoto mai nei. Kite kore tatou e whakaae tera pea e maker atu tenei taonga i o tatou ringaringa, a ka noho tatou i raro ote mana o o tatou pihopa tawhito. Hei whiriwhiri ma tatou, ko tehea rate mea pai, ko te noho ranei i raro i te mana o te Pihopatanga pakeha, penei me tatou e noho nei; ko te noho ranei i raro i te mana o te Pihopatanga Maori motuhake, engari ko te upoko o taua Pihopatanga Maori, he pakeha. Ki taku titiro, nui rawa atu nga painga e puta ki te Hahi i roto i te iwi Maori, mehemea ka hopu o tatou ringaringa ki tenei taonga inaianei, ahakoa he pakeha te upoko. E ki ana te whakatauki a te pakeha, “Pai ke atu te hawhe rohi ite kore rawa.” Kite noho mai he pakeha hei pihopa mo

tatou ko ona ringaringa, ka ona kanohi. ko on a waewae, ka Maori katoa. Ka whiwhi tatou ki to tatcu hinota motuhake mo te iwi Maori, ka hoki mai ki a tatou nga whakahaere o nga henna i tapaea kite Hahi e o tatou matua i roto i. te ran tau ka huri nek me nga tahua a te iwi Maori i tapae ai mo ia mahi. mo ia mahi i raro i nga tikanga o te Hahi. He tino taonga ra enei, hei hopu ma tatou. Waiho atu te turanga pihopa ki o tatou hoa pakeha mo tenei wa, kia rite ai ki o ratou hiahia. Mutu rawa ake te pakeha, kua ara mai pea he taniaiti Maori i puta mai i nga kura nunui o te motu, a kua whai taitara i nga kura nunui, kua rite kite hiahia o o tatou pihopa. Tae rawa atu ki tera wa, kua taunga te Hahi Maori ki nga whakahaere o te Pihopatanga, kua mania te mahi ma te Pihopa Maori. Kaati ra i konei enei whiriwhiri a te hinengaro mo tenei take nui. Ehara ete iwi, he wero ra i a koutou kia whai kaupapa korero ai tatou mo tenei taonga nui e tu a-wairua mai nei i o tatou aroaro i tenei wa. Ko te tumanako kia terete whakatinanatia, hei painga mo te Hahi i roto i a tatou i te iwi Maori. Ma te Matua i te wahi ngaro tatou katoa e arataki. e whakamarama, kia rite ai a tatou mahi ki tana i whakarite mai ai.