TAMARAU TAKARUA na IKI POUWHARE

Te Ao Hou, December 1959, Page 3

TAMARAU TAKARUA na IKI POUWHARE Tuuhoe o runga i ngaa marae maha o roto i te rohe, teenaa koutou, teenaa koutou. Kua uru taatau ki te tau hoou e kiia nei ko te tau 1959. Kua titiro ki mua, ka titiro ki muri, tere tonu te kite o te ngaronga me te paa mai o te mamae. ki te ngaakau me te aroha ki too taatau taina, tuakana, paapaa, koroua, ki a Tamarau. Naa te tau hoou i whakaatu kua mate a Tamarau. Kua kore i kitee i runga i ngaa marae i ngaa Hanuere, i ngaa Hurae, i ngaa tekau maa rua o roto i te tau 1959. Noo reira e ngaa rangatira o roto i te rohe o Tuuhoe hai mihi whakamutu atu ki too taatau rangatira, ki a Tamarau: Tamarau Tuu-kete-nui, e ara ki runga ra! Kauhautia ra te kauhau ariki, Ko Toroa, ko Tuuhoe-pootiki, Ka puta ra koe ki te whai-ao, ki te ao-maarama. Ka ngarue te whenua, ka ngaoko te moana, Tangi ai oo iwi, e koro, ki aa koe. Ka riro atu na koe, i ohou tiipuna, I a Mate, i a Pirau, i a Ngaro-ki-te-poo, I a Tuu-hikitia, i a Tu-hapaina, Tuu-marere-i-runga, Tuu-marere-i-raro. Kai ai te aroha i roto i te tangata, Kia niwha te tapuae, tohe toto te tapuae, ritoto te tapuae, Hara mai te mate hai kai e-e. Tipi nuku, tipi rangi, ko koe kai tipia noatia E Houhou-nuku, e Houhou-rangi Hinga atu, hinga mai, takoto i ngaa waa takoto i o te nuku, He tapu te rangi tee tuatua, he tapu te rangi tee wawaaia, E kii mai ana koe, me nukunuku, me nekeneke, i runga i oo iwi. Koia Taane amo ake, amo ake Tuuhoe i toona raukura, i a Tamarau, tuaia e te mate. Ka riro ki raro ra ki te Poo-uriuri, ki te Pootangotango, Ki te Poo-oti-atu, ki a Ruaumoko. Whakarere iho ana te tangi a Onewhero, “Ko manini tua, ko manini aro, Ka tangi a Tuuhoe, ka tangi wiwini, Ka tangi a Toohea, ka tangi wawana, Kuukuutia, koorukutia hai i-i.”