Pikipiki motumotu ka hokia he whanaunga

Muka, Volume 16, Issue 1, 1 September 2003, Page 5

Pikipiki motumotu ka hokia he whanaunga

Nā Julian Wilcox, Nō Ngāti Tūwharetoa, Ngā Puhi, Te Arawa

No te wa ka rangawhawha te korero, kua puea ake te whakapapa Maori a Christian Cullen, ko ahau tonu tetahi i peke ki Ranginuiatamakurangi. Ina, he toa tangatanga kite whutuporo, ma tenei ringa rehe te tima Maori e tautawhi. Na wai a, ka mutu a ratou takaro, kaore i arikarika te pai, haunga ra te taha ki a Ingarangi! Katahi ka tau taku mauri mo tetahi raro potehetehe nei!

Mea rawa ake, ka puta te korero e mea ana ehara a Christian i te Maori. Tauporo rawa taku aroha atu ki a ia! Kekero ana te aroha i te tauarotanga mai a te tangata ra kite whakapapa Maori, hei oranga whutuporo noa iho! Ka mutu, ehara i te whakatoitoi rawa mai, he matai porotutaki noa iho! Wa te iwi Maori and hoki! Na tatou tonu a ia i tauwhiro, kia pai te ngawi. Te mutunga iho, he ngongo, he tiwhatiwha, he whakama a tatou kai. laianei, u pu tonu ana nga whakawhiu a-iwi ke. Kua roa ratou e whakaiti nei i te tu motuhake a te

tima Maori, mete mea nei, he takahi i te mana o te ope matua o Aotearoa. Hurd katoa ana ratou i te kata, i te mea, te hanga nei, kite hiahia tetahi kia takaro mo to tatou tima, ma te ki noa iho a te toa tangatanga ‘ae, he Maori ahau’, ka taea. Te taea hoki e wai ake ranei te karo atu, ina hoki ra kua take te kawa i a Christian. Na whai and, e hoki nei ahau mahara ki a Hauokai raua ko tana whanaunga a Tamakitewananga. E ai ki nga korero, he tangata hohoro a Hauokai kia wheta atu kite papa kai a Tamakitewananga, engari ko te ngaki, e kore. Arorangi atu te patai a Tama; “E Hau, he kai anahe te take e puta mai ai koe ki a au?” “E kao” ta Hau, “he whakawhanaungatanga ke.’ “Engari ko te wa kai anake te takunetanga e whakawhanaunga ai taua,” ta Tama. Katahi a Hau ka ihupari, ka pamamae. “A kati, kua mutu taku haere mai ki

konei, kia toro whanaunga ai taua.” Ko ta Tama urupare atu; “Pikipiki motumotu ka hokia he whanaunga.” Ara, matau tonu a Tamakitewananga, maoa ana nga kai ki tona whare, he wa tona e hiakai ai a Hauokai, ka waihape ano a ia kite whakawhanaunga. Ko Christian Cullen pea te whakatinanatanga o te whakatauki nei. Parea atu a ia e te tima matua, katahi ka kitea tona taha Maori, hei oranga mona. Maku e ki atu, me kore ake te moni nui i Airihi, kua mate ano tatou te whakarongo ki a ia e upono ana kite whakatau, “Ae, pono, he Maori tonu ahau!” Mete mari ate Maori, aianei pea hurumutu ai te kata whakatoke mai a iwi ke. Heoi, kia mataara tatou! Tona tikanga, kua mau te iro. Kei tupono kitea ano he toa tangatanga katahi and ka toro i ona heinga kite Maori, hei oranga noa iho nei mona. Kei ara ano tenei ahuatanga hei katakata ma

te iti mete rahi, katahi te huatau nei ka toko ake; “Ae marika Maori ma, pikipiki motumotu ka hokia he whanaunga!”