Te Tangata Whai Rawa o Wēniti

Muka, Volume 14, Issue 2, 1 December 2002, Page 1

Te Tangata Whai Rawa o Wēniti

Nā Scotty Morrison

No te mutunga o te marama o Kohitatea, i te tau rua mano ma tahi, i oti pai ai te whakatinanatanga o te moemoea a tera o a tatou tangata matau a Pei Te Hurinui, kia aruaru atu tatou te Maori i nga tuhinga a Wiremu Rurutao hei mahinga ma tatou.

He mea whakamaori te tuhinga 'Te Tangata Whai Rawa o Weniti' e Pei i te tau 1946, otira, ehara tana toa i te toa

takitahi, engari, ara ke nga pukorero o te motu i whakapeto ngoi, i whakapau kaha, kite awhina ia ia kite

whakamaori i te korero nei a Rurutao

Ko Reweti Kohere tera, ko Kepa Ehau tera, otira, ko ratou katoa era i mahi ohu ai, kia tutuki pai ai te whakamaoritanga i runga i tera korero, "Ma tini, ma mano ka rapa te whai".

Taka rawa mai ki enei ra nei, kua whakakiriatatia e matou ta ratou i whakamaori ai. No reira, e taea pea te ki, kua rapa te whai, kua whakatinanatia te moemoea, a, a ko ko tonu ake nei, ka puta ta matou i mahi ai hei matakitakitanga, otira, hei whakawatanga hoki ma koutou! Whakamataku ana tera! Whakamataku ana na te mea, kei hea mai he iwi mohio atu i a tatou te Maori kite whakawa!

A kati, e tino tika ana kia tuku mihi ki a Don Selwyn, tera o nga rei puta i te ao hanga pikitia, mona i whakaaraara ake i tenei kaupapa. Nana matou nga kaitapere i ata whakapakari i nga ra i mua tata mai i te timatanga o te

whakakiriatatanga, a, nana hoki matou i ata tohutohu kia tutakarerewa matou i nga wa e mahi ana, kia kore ai a matou mahi whakaari e tapepe, e he rawa.

Otira kia kore ai hoki e wareware i a matou a matou rarangi korero!

Ahakoa he pukapuka ke te roa o etahi o nga rarangi korero (he roa no te kakau o te paipa a Rurutao!), ko te korero tonu a Don ina wareware i a matou, "He whakapau kuri noa iho tera i te putea!" Heoi, e tika ana hoki kia mihi atu ki a Ruth Kaupua-Panapa, te kaiwhakahaere matua, raua ko Selwyn Muru mo ta raua taunaki i te kaupapa, otira, ki nga kaimahi katoa mo ta ratou i mahi nui ai hei huruhuru mo nga waewae o Don. Ko nga kaitapere o roto, ko Waihoroi Shortland (Hairoka), ko Ngarimu Daniels (Pohia), ko Te Rangihau Gilbert (Patanio), ko Veeshayne Armstrong (Nerita), ko Sonny Kirikiri (Karatiano), a, ko au, ko Scotty Morrison (Anatonio-te tangata whairawa tonu ....ahakoa he pohara ke au i te ao tuturu nei!).

No reira e hoa ma, ko te whainga nui, kia eke a panuku, kia eke hoki a Tangaroa, kia puea ake tenei o a tatou kiriata reo Maori ki nga topito katoa o te ao, kia rangona ai to tatou reo ataahua, tona mita me tona rangi, e te ti, e te ta.