Te kōrero a Q

Muka, Volume 13, Issue 2, 1 December 2000, Page 4

Te kōrero a Q

Kia ora ra tatou. I tenei putanga o ‘He Muka’, ka huri aku whakaaro ki tetahi mahi ngahau, ara, kite waiata. I mua, he tino mahi ano tana, he whakaako whakapapa, he whakangahau, he whakapakari, he whakatairanga i te reo. Ahakoa he huarahi tawhito, kua kaha rawa te whaia i enei wa. Huri atu, huri mai, rangona ana te reo reka o wai, o wai, kite waiata, tae atu hoki kite “koroke haehae ngakau” nei ki a Brannigan Kaa, “...i nga wa o mua... maumahara noa au”. Mahara pai hoki au ki nga wahine i nga marama, nga tau ranei i muri mai, ka mahara ake, ka kite ano, he tane hou ke - aue taukiri e! Hei taku, koia tenei ko te pai o enei momo waiata. Ko nga waiata o mua, no mua ke. He mea tika tonu ano kia whakaakona tonutia era waiata ki a tatou tamariki, kei ngaro. Erangi, mo te hiahia whakarongo waiata rawe noa iho, waiata hangai nga kupu, nga kaupapa, nga whakaaro kite ao o naianei, kau ke atu i nga waiata penei i te ‘Maumahara noa au’ nei. Kua hanga hoha noa iho au kite whakarongo atu: - “puritia kia mau, kia u, te mea, te mea, te mea”. Pai ke ki a au nga waiata e hangai pu ana ki toku ao nei na! Kia pera ano hoki nga rangi ka tino pai ke atu”. No enei wa tata nei ano, katahi ano ka puare mai nga huarahi e taea ai tenei momo waiata. Ka pakari haere to tatou reo rangatahi ma, ka timata enei momo waiata kite puta mai. I mua atu, na, koia tera, korero ana ki nga ahuatanga o mua, o tera wa ano. Kia ‘no tenei wa’ ke nga waiata o tenei wa ka rawe. No reira, hei whakamutu ake, ehara i te mea, e whakahawea ana ki nga waiata ataahua a Nunui ma, a Roroa ma, kahore. Pai tonu te whakarongo ki era waiata i etahi wa. He whakamihi ke ki nga hoia o tenei wa, e hoe ana i te waka i runga i te ia o tenei wa, mete whakauru atu ite reo ki roto, anana, kua pera ano i mua ra, he mahi ngahau, he tino mahi ano tana, he huarahi whakapakari i te reo. Na Q.