HE WAIATA ONAMATA

Muka, Volume 11, Issue 3, 1 July 1998, Page 8

HE WAIATA ONAMATA

Nā Mīria Simpson, Te Taura Whiri ite Reo Māori

E Te Kaipanui - Tae rawa atu Te Muka ki a koe kua puta te kopaepae puoro a te ropu taitama ‘Te Reo Rangatira Trust’.

Anei rawa te tino taonga ma te iwi Maori huri noa. He whakapaparanga i etahi o nga Moteatea i kohikohia i ona ra e Apirana Ngata, e tana tama, e Wiremu raua ko Wiremu Paaka, a, tae noa mai ki a Wiremu Kerekere ma.

Kua tawhito rawa hoki, kua tareparepa noa nga ripene o tera wa; na reira ka tipu te whakaaro i nga taitama nei me nanao atu ratou ki nga rawekeweke o to ratou nei ao, ki nga rorohiko, kia whanau hou mai ai nga reo reka o nga kaiwaiata, kia marama ai hoki nga kupu. Ko te kopaepae puoro tenei ka puta!

Apiti atu ko nga taputapu whakatangitangi - kia rangona atu te tangi a te putorino, a te putatara, a te pahu mete aha ake. Kei reira ano te pukapuka whakamarama i nga waiata mete whakamahi i aua taputapu ra.

Ko nga moteatea, me nga waiata no nga takiwa maha. Ko te whakapaparanga i whai i te ahua o tenei mea o te tangata - he waiata mo te tamaiti whanau hou, mo te taiohinga, he waiata whaiaipo, a, pakeke noa, kaumatua noa, mate noa. Ma tona ingoa tonu He Waiata Onamata e tohu he waiata, he moteatea no nga ra o mua te nuinga. I whakauruhia atu ano etahi, torutoru nei, o tenei rautau.

I ki ake ra ahau he tino taonga - ma nga pakeke, hei

whakaoho i nga mahara; ma nga uri whakaheke e whai ana kia matau ratou ki enei momo waiata. Ko te mea nui rawa, kia mau pai tenei ahua oto tatou reo rangatira.

Ko Te Reo Rangatira Trust te ropu whakaara; ko Whai Ngata, ko Henare te Ua, ko Bradford Te Apatu-o-te-rangi Haami, ko Timothy Moon, koina ratou. Tenei ratou te tuku mihi nei ki nga hunga awhina mai ite kaupapa -ki Te Reo Irirangi o Aotearoa, ki Te Toi Maori, ki Te Mangai Paho, ki Te Taura Whiri ite Reo Maori -He Taonga te Reo, kite Polynesian Society o Aotearoa.

Tena rawa atu koutou