HE KAUWHAU-TE RA ARANGA.

Kopara, Issue 7, 1 April 1914, Page 4

HE KAUWHAU-TE RA ARANGA.

i Koriniti 15. 17, 20. “ A kite kahore aTe Karaiti i ara, he mea hanga noa to koutou whakapono; kel roto tonu koutou i o koutou hara.” “ Ko tenei kua ara a Te Karaiti i te hunga mate, kua waiho hei matamua mo te hunga kua moe." ETINO whakau ana te Apotoro i tenei whakaaro kia tatou, ara ko te Whakapono Karaitiana ko tona kaupapa kei runga ite aranga o to tatou Kai-whakaora. Pena kaore te aranga kahore he painga o to tatou whakapono, ka memeha noa iho, a ka noho tonu tatou i roto i o tatou hara. Ko tenei whakaaro hei whakaahua kau i te ahua mo tatou ki te kahore a Te Karaiti i ara i te hunga mate. Ko tenei kua ara ke to tatou Ariki i te hunga mate a kua waiho hei matamua mo te hunga kua moe. Ko te taenga mai ano o Te Ra Aranga kia tatou i tenei tau a i enei tau e tu mai nei, ka ai hei homai wairua-kaha ki roto i nga Karaitiana. E rite ana tenei ra ki tetahi reo kaha e whakaoho ana i te tangata ite moe; ara hei whakakori i a tatou kite takatu mo runga i te ahuatanga mo a tatou mahi a-wairua. Ko te ra tenei i hinga ai te hoa whawhai ara te mate. “E te mate kei hea tou wero, ete po kei hea tou wikitoria ?” Ko te ra hoki tenei i tino kitea ai e tatou te aroha ote Atua. Pena kahore a Te Karaiti i ara kahore i tutuki tenei kupu, “ Koi ano te aroha o te Atua kite ao homai ana e ia tana tama kotahi, etc.” 1. Ko te aranga o Ihu Karaiti, he whakaatu tenei kia tatou koia te Tama aTe Atua. Eki ana hoki a Paora i a Roma 1, 4 “I whakapuakina mai nei ko te Tama a te Atua i runga i te kaha, i runga i ta te Wairua o te tapu, i te mea ka whakaarahia ite hunga mate.” Ko tona oranga, ko ana whakaakoranga, me ana merekara, a me tona matenga hoki, kahore rawa he painga kite mea kaore ia i ara, engari no tona aranga mai i te mate ka tino whakaungia e nei mea katoa, me era atu hoki mea i korero ai ia mo ona ano. 2. Ko te aranga o Ihu Karaiti, he whakaatu kia tatou tera tetahi oranga nui mo tatou kei te takato mai. Kahore ke atu he mea hei tino whakaatu mai kia tatau he oranga ano mo tatou kei te takoto mai, kite kahore aTe Karaiti i ara. No te mea kore i taea e ia te whawhai te mate, a ka noho tonu tatou i roto i o tatou hara, a kaore e whiwhi kite oranga tonutanga i te mea kaore he tangata hei waha i o tatou hara, kia mama ai tatau te haere kite wahi kei reira nei te oranga tonutanga. Kaati ko tenei kua ara to tatou kai-waha i o tatou hara, ara a Te Karaiti. Mana e whakapuare mai te wahi kei reira nei te oranga pumau. “ Ano ka taea e koe te wero o te mate: ka tuwhera ia koe te Rangatiratanga o te Rangi kite hunga whakapono katoa.”

3. Ko te aranga o Ihu Karaiti, he whakaatu mai kia tatou i etahi whakaakoranga hei whakaaronga ma tatou. Me patai tatou, tena kaore ranei he mea kei roto i au, e rite ana ki tenei aranga ? Kua ripekatia ranei te hara e ahau, a kua ara ake ranei toku wairua kite tiinga pono ? Ko te tino putake i hiahia ai a Paora kite whakaako i nga tangata o Roma mo runga i te Aranga, ka whakarapopototia ki raro i enei kupu, “ Waihoki mahara iho kia koutou, kua whakatupapakutia koutou kite hara, e ora ana ia kite Atua, i roto i a Ihu Karaiti.” Kahore e tino tika ta tatou ako i te whakaakoranga ote ra nei kite kahore tatou e whakaaro kite aranga o tona nei o tona nei wairua kite oranga tonutanga. 4. Ko te mea whakaraulunga e whakaatu mai ana te aranga o to tatou Ariki, ko te aranga hoki o tatou tinana. Ko ia “te matamua mo te hunga kua moe.” Na reira ko nga tangata kua moe ahakoa pai kino ranei tera te ra e ara katoa ai. Ko te aranga o te tinana ko tenei tetahi o nga whakaakoranga nui kei roto i to tatou whakapono. Ko etahi atu tu ahu whakapono he iti nei to ratou mohio ki tenei mea ki te aranga, engari kaore rawa ratou e mohio he aranga ano te te tinana. Ahakoa ano nga Hurai kaore ratou i tino mohio kite ahuatanga o tenei mea ote aranga ote tinana engari he poropititanga anake kei roto i te kawenata tawhito ruarua nei nga rarangi. Engari no te taenga mai oTe Karaiti ka tahi ano tenei take ka tino arohia ete tangata. I mua he pouri, engari no te taenga mai oTe Karaiti ka marama. Ko ia hoki te maramatanga nui o te ao.