KO HAIMONA PITA TAMATUAO

Whetu o te Tau, Volume 1, Issue 2, 1 November 1857, Page 4

KO HAIMONA PITA TAMATUAO

Kua mate a Haimona te hoa aroha o te Pakeha. No te orokonohoanga o te Pakeha ki Akarana ka kitea nuitia te aroha o tenei rangatira. He hoa ia no Kawana Kerei, ara no nga Kawana katoa; he tangata wehi ki te kino, he tangata rapu ki te pai. Haere atu ra e Mona e, haere atu ra i runga i te aroha nui o tou iwi o te Pakeha! Haere atu e pa ki te pai ki te ora! Tenei ano te pukapuka mo Haimona na tana tamaiti, na Paora Kawharu i tuhituhi; ko te kai-whakakapi mo te turanga o Haimona ko Hauraki Kaiarero, he teina tupu ano nona. Na Paora enei kupu : Ko te tikanga mo nga korero me nga ritenga mo tenei rangatira mo Haimona Pita Tamatuao, ko Kaipara ano tona kainga, ko tona iwi ano ko Te Taou, ko Ngatiwhatua He rangatira ano ia, i tupu mai ia i roto i nga tupuna nunui, rangatira, kaha, toa, no te mea, ko te tupuna tuatahi ko Ihenga, he nui tona toa. Ko te whakahaerenga tenei o nga tupuna o tenei tangata. Ko Ihenga te tua tahi, ta Ihenga ko Tarakete, ta Tarakete ko Tumupakihi, ta Tumupakihi, ko Wahaakia, ki ko ta Wahaakiaki ko Meri Te Hue, ta Meritehue ko Haimona Pita. I tenei tangata e ora ana ko tana mahi he noho karakia ki te Atua nui. Ko tetahi o ana mahi he whakamau tikanga mo nga whenua kei hokoa hetia. Ko tetahi ano o ana mahi be whakarite whakaaro ki nga tangata kia mohio. I haere ia ki te tua rakau hei waka mona i te 16 o nga ra o Mei, ka hinga te rakau i te ngaherehere, ko te roa o te rakau totara i hinga i a ia 85 putu, ko te nui 36 putu. Ka pa te mate i konei, katahi ka mea ki ona hoa "Tatou ka hoki ki te kainga, e kaha ana taku mate." Ka hoki ia ki tona kainga ki Paeroa, ka noho ia i runga i tona mate, ka karakia ia ki te Atua. Ka tiakina e ona whanaunga ki runga ki o ratou ringaringa, katahi ona kanohi ka titiro ake ki a Te Oteno, ka puta tana kupu ako ake ki a Te Otene, rangatira ano o Kaipara, ka mea, "I muri nei kia atawhai ki te tangata. He tangata whakanui koe i te he a te tangata," I te mutunga ano o ana kupu ako ki a ratou ka taka te tupapaku, ka moe ia i nga ra o Hune te 16 i te tau 1857. Ka haere nga rangatira kaumatua o roto o tenei iwi ki te uhunga ki a ia. Ko Apihai Te Kawau, ko Nopera Parenga, ko Hikiera Te Tinana, ko Hoete Paremata me nga rangatira taitamariki, me nga wahine katoa I haere ki te tangi moto ratou whanaunga, mo to ratou matua. Ka puta mai hoki ko Ngatiwhatua, ko Ngapuhi, ko Te Kawerau, ko Ngatitahinga; ka huihui nga iwi, poto ka toa kia kite i tenei tangata No te 22 o nga ra ka nehua te tupapaku ki tana takotoranga. I korerotia i reira tana atawhai i te Pakeha, i te tangata Maori, a, puta ana te kupu whakapai mo ana mahi katoa. Na Paora Kawharu. Na Hare Reweti. Akarana, Oketopa 10, 1857.