HE PANUITANGA.

Mareikura, Issue I, 1 August 1911, Page 3

HE PANUITANGA.

He panuitanga tenei ka tukua atu ki nga iwi, ki nga hapu, o nga marae o nga motu e rua nei, me era atu motu.e patata ana rnai ki enei, tena koutou. Ka mihia taurangatia atu nei i te wa mamao, i tenei taha o nga huapae maunga o nga huamotanga o nga tuatea o te moana nui a Kiwa e hora nei, te kite atu, te kite mai tatau ka mahue ake nei i te aoturoa nei hei morehu; tena koutou me nga aitua o nga mea o tatau kua wehe atu nei ratau kite aroaro o to ratau tipuna, o Hine-nui-te-po, i te muriwai hou ki rarohenga, i rite ai te kupu whakatauki, " ka heke kite muriwaihou, ki rarohenga i te ara whanui a Taane, i Tahekeroa, e heke nei tena marae, tena marae, tena motu, tena motu o te Ao katoa, kite Potiwha, ki Rarohenga, heoi e taea te aha e tatau, te mate, e kore ea, ahakoa ko wai te tangata o te Ao nei. Heoi ra hei kona mihi noa ai ki nga marae, ki nga taumata, ki nga huanui haerenga o ratau, ki nga maunga kainga kanohi, o ratau kua wehe atu nei ia tatau, i rite ai tenei whakatauaki ,a nga tipuna "whatungarongaro he tangata, toitu he whenua" whakaaetia ana e tetahi o a ratau whakatauaki, e mea nei, " B ngaro ana he tetekura, e whakaete ana he tetekura." Kaati, kaore i rite tenei o a ratau whakatauki i oti ki runga i tetahi o aua kupu i ngaro katoa i nga teteku a nei. Kei te penei te ahua o nga morehu e ora i te Ao nei. Heoi e nga iwi, he nui te aroha ki o tatau rangatira, me o tatau tangata mohio, whakataki o nga iwi, o tatau motu e rua nei, ngaro ana ratau, ngaro ana hoki a ratau karere kawe i a ratau whakaaro, me a ratau tohutohu i nga iwi, i nga hapu, i nga tangata. Kua hinga a te Wakamaori, a te Wananga, a te Tiupiri, a te Huia, a te Matuhi, me era nupepa maha a ratau, ngaro ana ratau nga rangatira, me a ratau karere nupepa, e kiia ake nei. Na i tenei tau o. to tatau Ariki o Ihu Karaiti, 1911, ka oho ake te whakaaro o nga morehu, o nga rangatira i mahue ake i a aitua i te Ao nei, a Wi Pere, a Mangakahia, me era atu tini o nga tangata o nga iwi, o nga hapu, o nga motu nei, ki Papawai, ka mea ratau me whakatu te Kotahitanga o nga iwi, o nga motu e rua nei, hei pupuri i te mana rangatira, i te mana whakahaere, i te pai i te ora, i te rangimarie mo nga iwi Maori, na i te mea kua whakaaetia taua take, kia whakatuturutia e nga iwi Maori o nga motu nei, koia ka whakaarotia kia whakaturia he karere ma tatau, ara he nupepa hei toro haere i o tatau marae katoa, hei whakaatu mai i te ahua mete whak aaro a nga morehu o ia marae, o ia marae o tar.au o nga motu e rua nei, puta atu ki nga rongo

koraro o nga iwi Pakeha, o nga motu o te Ao nei, hei whakaatu mai i nga korero ote Paremata, hei whakaatu mai i nga mahi ahu whenua kia tatau, hei -whakaatu hoki i o tatau hiahia ake kia . tatau ano, kite Kawanatanga ranei, ma konei ka marama ai tatau, me titiro tatau koia nei te tika o nga iwi Pakeha, i tika ai, ko ta te kura ako, ko ta te nupepa ako, ka rua ai hei whakatuturu i te matauranga. Kaati kua whakaturia e matau tetahi nupepa ma tatau, ko te " Mareikura" te ingoa, hei toro haere ia tatau e nga iwi, e nga hapu, i a tatau marae, o nga motu e rua nei. Na ko te tangata e hiahia ana kia peka atu a te " Mareikura" ki tona akewhare, me tuku mai e ia te moni, tekau ma rua hereni, 12/- i te tau kotahi. Ko te Etita mo taua- pepa ko W. H. Manihera, me tuku katoa nga reta whakaatu korero, hui, tupapaku, mate rne era atu rongo korero katoa ki a ia, ma ana e ata tirotiro aua reta. Ko nga reta mauahara, korero kino, whakapae ki tetahi tangata, e kore e tukua kia haria e te " Mareikura." Ko te tangata hei tukunga atu i a koutou moni utu mo te pepa ko Hori Maki Wharangi, o Kereitaone, wahi o Wairarapa, ma ana e whakaatu kite Etita, kia tukua atu to pepa kite poutaDeta e tika ai k a koe, no reira kia marama to ingoa mo te poutapeta, hei taenga atu mo to nupepa. Ki te pai koe kite tuku tonu atu kia Hori Maki Wharangi i to 12/- mo to pepa, me kawe e koe to 12/- hereni ki te Pohi Mahita o te poutapeta, ma ana e homai kia koe he Pohi Ota moni, 12/te whika e mau ana, ka kokomo e koe ki roto i .te whare pukapuka, ka whakamau te pane kiingi ki runga ka tuku kia Hori Maki Wharangi, Kai-whaka-maori, o Kereitaone, Wairarapa, kite pena to tuku ka tae tonu ki a ia, a ka tukuna atu e ia te rihiti o to moni, a ka puta atu hoki to pepa kia koe. Na me whakatupato koe kite Pohi Mahita, ki ona tangata ranei, kia kaua to pepa e tukua kia riro i tetahi tangata ke noa atu, engari mau ake ranei, ma te tangata ranei i whakaritea e koe hei mau atu i to pepa ki to whare, kia kore ai e ngaro to pepa, koia nei i whakatupato atu ai i a koutou i nga tangata tango pepa. Heoi kia kaha te tono pepa mai ma koutou inaianei. Kia kaha tonu koutou te tautoko mai i ta tatau nupepa inaianei hei tohutohu i a tatau. Heoi na te ropu whakahaere o te "Mareikura." 1e Mareikura.