Siva Tele

Mana (Auckland), Volume 2, Issue 2, 20 April 1978, Page 7

Siva Tele

Ile Aso To’ona’i o le masina nei, o le a faia ai se siva tele a la tatou ofisa nei o le Nusipepa “Mana”. O lenei Siva o le a faia i le Overseas Lounge i le Princess Whalf i Aukilani.

O le ’autu ma le fa’amoemoe o lenei taumafaiga, o le fia sa’ilia lea o se fesoasoani tau tupe e galue’ina a’i le Nusipepa mo le tausaga atoa lenei, ia lelei mo la outou faitau, ma fa’apea fo’i le fa’amoemoe ia fa’ataunu’uina ole Nusipepa ia fai ma auala e feso’ota’i ai o tatou tagata o lo’o afifio ma alaala i le lautele o le atunu’u o Niu Sila.

O le tau o le pepa e $25.00 mo le to’alua, e aofia ai le taumafataga matagofie, mea inu, siva ma le tele o fa’afiafiaga fa’a atumotu. O kamupani va’alele a

le Polynesian Airline, Air Pacific ma le Fiji Visitors Bureau o lo’o latou lagolagoina lenei taumafaiga. O fa’afiafiaga mo lea po, o le a fa’atasi mai ai le ’au siva mai Toga fesoasoani a le Air Pacific, Siva ’ailao afi mai Samoa i Sisifo fesoasoani a le Polynesian Airline, Yandall Sisters ma le tele o isi tagata fa’afiafia mai totonu lava o Niu Sila nei o le a fa’atasi ai i lea po. Amata nei loa ona fa’aputu se tau o lau pepa, ma e mafai ona maua mai i ofisa nei Polynesian Airline i Karangahape Road, Corner Booking Office, Venusi’s Travel Bureau i St Kevins Arcade i K’Raod male ofisa o la tatou nusipepa i le 12A East St, Newton e soso’o ma le Fale Meli o Newton.