Iki-anga Maata i te Kuki Airani
Te riro nei teia aura i roto i te ngakau o te iti tangata Kuki Airani, e aura teatea-mamao no te iki-anga maata e tae viviki mai nei i te ra 30 no Mati i teia mataiti nei. Te teateamamao nei oki nga tua ravarai e rua, koia oki te Cook Islands Party e te Democratic Party. Inara, kare ua e ko nga pati ua teia i te Kuki Airani. Kua tupu katoa oki te manako i roto ia Joe Williams raua ko William Estall no te akatupu atu i te Independence Party, e pera katoa ki tetai metua tane tei manakoia e nana e akaaere mai nei i te Unity Party. Ko teia metua koia oki ko Papa Raui Pokoati, koia oki tetai tei rere atu ki vao i te Cook Islands Party. Kua pera katoa oki kia Eric Browne, koia oki tetai tei akaatea atu iaia no roto mai i te Kavamani.
Ka riro teia iki anga ei iki anga mataora, no te maata oki o te au tangata tei noo ana ki roto i te Kavamani, e i muri mai kua manako atu no te neke ki vao penei no te kimikimi anga i tetai ravenga ei akatuke i te akaaere anga i to tatou basileia Kuki Airani.
Ko te angaanga poritiki i roto i te Kuki Airani, kua marama tatou e kare te reira i te angaanga tei matauia e to tatou ui tupuna. I te mataiti 1965, kua riro tatou na tatou rai i akaaere ia tatou. Kareka ra, te vai nei rai to tatou irinaki anga kite tauturu a Nu Tireni.
I teia nei i reira, kua tae tatou kite 13 mataiti i raro ake i te akaaere anga a te Cook Islands Party. Eaa taau i kite?
Akara kite apii a te tamariki i te Kuki Airani. Akara kite au
akaaere o te Kavamani, koai ma ratou, e koai ma tei akaatea ia ratou ki vao, eaa te tumu. Akara kite moni a Nu Tireni e tuku nei kite Kuki Airani, eaa te akairo. Akara kite ture no runga ia ratou tei aere mai ki Nu Tireni, eaa tei tupu mai nei ki to ratou enua tupu? Akara ra kite au uki ou tei rava to ratou marama i te akaaere i to tatou basileia.
E mea tau rai kia akataui ia te akaaere i to tatou basileia, penei ka riro mai te marama o te au uki ou ei tauturu atu i te angai anga i to tatou iti tangata kite kai memeitaki, e kite kai tuketuke rai.
Te tuku atu nei te Mana i to ratou aroa kite Kavamani te ka riro mai iaia te re.
Permanent link to this item
https://paperspast.natlib.govt.nz/newspapers/MANAK19780223.2.11.1
Bibliographic details
Mana (Auckland), Volume 1, Issue 15, 23 February 1978, Page 3
Word Count
451Iki-anga Maata i te Kuki Airani Mana (Auckland), Volume 1, Issue 15, 23 February 1978, Page 3
Using This Item
The National Library of New Zealand Te Puna Mātauranga o Aotearoa was granted permission to digitise Mana and make it available online by the convenor of the Mana Interim Committee under a Creative Commons Attribution-NonCommercial-ShareAlike 4.0 International licence (CC BY-NC-SA 4.0). This newspaper is not available for commercial use without the consent of the copyright holder.
If you are a rights holder and are concerned that you have found in-copyright material on our website, for which you have not given permission, or is not covered by a limitation or exception in New Zealand law, please contact us at paperspast@natlib.govt.nz
Log in