Ko e feinga tokoni ma’a Tonga

Mana (Auckland), Volume 1, Issue 14, 9 February 1978, Page 7

Ko e feinga tokoni ma’a Tonga

’Oku ’ikai ko hame’a fo’ou ’a e ngaahi feinga pa’anga tokoni ki hotau kainga ’i Tonga ’o ’ikai ngata pe he fakafamili pe fakafo’ituitui kae tautautefito ki he ngaahi ngaue fakafonua pe fakasiasi. ’Oku feinga e ni’ihi ke langa falelotu, ko e ni’ihi ke tanu hala pea ko e ni’ihi ko e feinga’i honau vai.

’Oku mahino mai ko e ngaahi feinga ni 'oku fakafalala mai ki he kakai Tonga ’i Nu’u Sila ni 'o hoko ai ’a e ngaahi hulohula, koniseti pe kalapu kava Tonga.

’I he ngaahi ’aho ni 'oku ’i ai ’a e totonu ke toe fakakaukau’i lelei ha founga kumi’anga pa’anga koe’uhi ko e nounou fakapa’anga 'oku lolotonga 'i Nu’u Sila he ngaahi ’aho ni.

I he mahino mai 'oku hilifaki tonu e ngaahi kavenga ni he kainga Tonga

kotoa pe ’i Nu’u Sila ni ko e me’a ’e ua 'oku hoko. ’Uluaki. ’e fai e mafasia ’a e kakai ’o kapau ’e lahi ai pe ’a e ngaahi fakatangi ni Ko hono ua, ’e faingata’a ange ke lava e ngaahi feinga tokoni koe’uhi ko e nounou fakapa’anga 'o e ngaahi ’aho ni.

Ko 'eni e fokotu’u ke fai aki ha ngaahi fakakaukau fo’ou ki he kaha’u. 'Oku totonu ke fakakaukau’i ha ngaahi founga ke mau ai e tokoni fakapa’anga ni mei he kakai totonu e fonua ni kae ’oua ’e fakafalala ai pe e me’a kotoa ki he kainga Tonga ’i Nu’u Silani. 'E ’ikai ke ngata pe he fakasi’isi'i ange ’a e mafasia ka ’oku mahino mai e ma’u ange ha silini lelei mei he kakai koe ’oku tu’umalie ange he fonua ni. ’Oku iai foki e ngaahi komiti pe Potungaue fakafonua pe fakapule’anga

he fonua ni oku nau fie tokoni ki he ngaahi feinga fakalakalaka hange ko ia ’oku fai ki ai e ngaahi feinga pa’anga pehe ni.

Ko e Kolisi Tutuku 'a Atenisi (Atenisi Alumnae Association) kuo nau feinga kinautuolu ’o nau kau he kautaha tokoni fakafonua 'a Nu’u Sila ni ko e CORSO. I he tali ke nau kau he kautaha ni 'e fai leva ha fetokoni 'aki a e kolisi tutuku pea mo e kautaha ke fai ha no fakakaukau’i e ngaahi feinga pa’anga ma’a e ’apiako ni i Tonga.

’Oku ’iai foki mo e tokoni faka-Pule’anga 'a e Potungaue ki Muli 'a Nu’u Sila ni (Department of External Affairs) ki ha ngaahi sosaieti pe kulupu fakalotofonua 'oku nau fai ha ngaahitokoni ki he ngaue fakalakalaka ’i ha fonua ’i tu’apuleanga. Kuo pau ke ma’u e foomu mei he potungaue ni ke fai 'aki ha fakamatala mo tali ’e nau ngaahi fehu’i fekau’aki mo e ngaue ’oku tokoni’i pea toki lava ke fai ha’a nau tokoni.

Ko ia e ngaahi fokotu’u ke makatu’unga ai ha ngaahi fakakaukau fo’ou ke lava e ngaahi tokoni ko ia ’oku fai ki hotau fonua mo toe fakama’ama'a ange e kavenga hotau kainga 'i Nu’u Sila ni he ngaahi ’aho ni lolotonga e nounou e ngaue mo e pa’anga. Te mau loto fiemaiie 'aupito ke ’oatu ha fakahinohino mo ha fa’ufa’u ki ha tokotaha pe fa’ahinga ’oku nau fie ’ilo ki he ngaahi kautaha tokoni ’e ala fai ki ai ha kole tokoni. Ko e ngaahi faka'eke’eke ni oku totonu ke fai ia ki he Editor (Tongan Section) Mana P.O. Box Auckland.