Fiji News

Mana (Auckland), Volume 1, Issue 13, 26 January 1978, Page 2

Fiji News

E natalevi Niu Siladi e na vula mai muri ko Mr Bill Bates me vakaraitaka na nona duiyaloyalo i boro waiwai me baleti Viti (Fiji In Oils). E na vakaraitaki tiko mai na Auckland Building Centre, Victoria Street West, e Okaladi me vakatekivu e na i ka 6 ki na i ka 18 ni siga ni vula ko Maji. A tadu mai ki Okaladi e na mua ni Janueri ni yabaki oqo ko Adi Vaciseva Bonacibau, na makubudra na gone turaga na Tui Levuka, ka a rawata na i tutu ni Centenary Queen e na Veisisivi Radi Ni Senitenari, e na soqo cecekia ni vakananumi ka a vakayacori mai Levuka e na Noveba ni yabaki sa oti me vakananumi kina na yabaki 100 ni kena tauyavutaki na Levuka Town Council. A tavaki Adi Vae na rara ni waqavuka na Auckland International Airport ko Mr Richard Prebble, na M.P. nei Okaladi E Loma kei na watina ko Adi Nanise (Mrs Nancy Prebble), na tacidra na gone turaga na Tui Levuka. A talevi Niu Siladi e na vula sa oti ko Mr DaVid Tonganivalu M.P. A mai tiko vakaiekaleka e Okaladi ko koya ni bera ni lesu ki

Viti. E ka ni yalobibi vei au me’u vakaraitaka yani na nona bale vakasauri e na Tiseba sa dromu ko Mr Julian Tonganivalu. Ki vei Willie, Joe, David, Maraia, Francis kei Lily, au duavata kei kemuni e na rarawa levu ka a yacovi kemuni kece e na nona sa vakacegu mai na bula na tacimuni lomani. 4: * * Na vula ko Tiseba e dua na vula rarawa talega vei ira e so na wekada e Okaladi e na vuku ni nodra mate e so na wekadra. Oqo na yacadra na wekada ka ra sa takali, Miss Sera Tavitora; Mrs Leona Abbott kei Mrs Agnes Goulding. Ki vei kemuni kece na nodra duimataveiluveni kei na wekadra e Okaladi, au duavata kei kemuni e na nomuni yalorarawa. Me nomuni na veivakakalougata-taki kei na veivakacegui mai vua na Tamada sa Cecere Sara. E na gole vakagade ki Te Anau e na Yanuyanu na Ceva (South Island) e na vula oqo na manidia ni Valenivolavola ni Saravanua nei Viti e Niu Siladi, ko Mr Bill Raikuna kei Mrs Raikuna vata kei na nodrau mataveiluveni. ka eratou na laki olodei vula dua mai kea.

Sa lewa na Matanitu ko Viti me lesi e dua na nona i Talaki Levu (High Commissioner) ki Niu Siladi e na vula ko Maji ni yabaki oqo. E na vakaitikotiko mai Welegitoni na Ai Komisina. A mata tiko nei Viti ki Niu Siladi ko Mr Bill Raikuna me tekivu sara mai na gauna ka a taura kina na i tutu ni manidia ni Valenivolavola ni Saravanua kei Viti e Niu Siladi e na yabaki 1968. A vakayacori mai Karasijoji e na vula sa oti e dua na soqo lailai ni siga ni sucu nei Mr Maciu Gonewai e na nona sa yacova na yabaki 21 ni dede ni nona bula. E gone turaga ni Bua, Vanua Levu, ko Mr Gonewai ka vakaitikotiko mai Birisibane, Ositerelia. A lako vakacakacaka olodei (working holiday) mai e na mua ni yabaki sa oti ki Niu Siladi ko koya. Vinaka vakalevu na volavola mai Maciu, au nuitaka ni ko na marautaka na nomu tiko e Niu Siladi, ka me nomu tiko ga na kalougata kei na bula balavu. * * * Oqo e dua na serekali ni vakabula ki vei kemuni na turaga kei na marama dauwili Mana. A

vakauta mai na serekali oqo ko Mr Peceli Waqa ka vakaitikotiko mai Danidini (Dunedin) e na Yanuyanu na Ceva, ka lako vata tiko mai kei na nona loloma ki vei kemuni kece na Noda ko ni vakaitikotiko e na Yanuyanu na Tokalau. E gone turaga ni Tailevu mai na tikina vakaturaga ko Verata ko Mr Waqa, 28, vakawati, na watina e marama i taukei ni Niu Siladi ka rua tiko na luvedrau yalewa, Talei (4) kei Marama (2). Ni wilika mada yani na nona serekali: a. Ni sa bula na turaga kei na marama e North Island raraba Ni vakilakilai au saka mada. Na yacaqu ko Daunivakasala Na yacaqu ko Cagi ni Liwa Lawa b. So na gauna me’u gade yani, Au tu voli ka vakararai Sega sega sara e bau kauwai. Sa rui levu nomuni yalowai. c. Dua ga na vosa me’u tukuna. Nomuni vanua ni taura matua Ni vakaliuca na Kalou Bula. Me yacova ni rusa na vuravura d. Noqu serekali sa lomaqu me’u tinia. Tini vata kei na vakaisaisa Sa vakarewa oti nomuni Kuila. Au sa vakamoce vei Peritania. Vinaka vakalevu na vakau serekali mai Peceli!