21 Mataiti

Mana (Auckland), Volume 1, Issue 8, 13 October 1977, Page 4

21 Mataiti

I te Manakai ra 1 no Okotopa kua rave ia tetai aka angaanaga maata e te manea tikai. I rave ia tei reira kite are pure P.I.C.C. i Edinburgh St i te taoni nei i Akarana. Ko te akakoroanga maata ko te akamaaraanga i te taenga te mataiti o te 20 o te kamupani Boys Brigade o Akarana nei kite 21 mataiti.

Kua na mua te pure i te rave ia. Kua na roto tei reira i te au reo imene, tuatua akoanga (na te Orometua ko Papa Sio i rave i tei reira), te au tautauanga tuatua tapu, e te au akamorianga na roto i te pure akameitakianga i te Metua Atua i te rangi.

Kua tae ta ratou i rave kite akamaaraanga i to tatou metua ia Papa Tiare Orometua, te tangata tei tuku e tei akamou i te tango o te ia taokotaianga nei ki roto i te taoni nei ia Akarana. I akamata oki tei reira i te mataiti 1955-1956.

I muri ake i te pure kua rave ia te “toasting" kite ariki vaine, kia Papa Tiare, ki te au aronga tangata i akamata ia ei taua taokotaianga nei, e peraki te au akaaere e te au tamariki BB katoa ko ratou tei piri kite akatupuanga i te ia angaanga meitaki nei kirotopui to tatou au iti tangata no te pa enua i tai mai ia Nu Tireni nei. E aka umukai tei rave ia. Pinga tikai tei reira e kare i pou ana. Kua kapiti katoa mai oki te angaanga tamataora ura ki roto i taua akaaereanga nei. E manea tikai te au ura tamataora tei rave ia ana. Ooki ua atu te au tangata ki to ratou au kainga e te mataora maata e pera katoa te pumaana kite au ngakau o te au metua no ta ratou au tamariki tei piri ki roto i te ia taokotaianga nei. Kua rekareka maata tikai te “Chaplain” o te ia kamupani BB nei kite tauturu ta te au metua i rave no ta ratou au tamariki i te turuanga mai ia ratou kia kimi ia lesu na roto i te topirianga ki roto i te angaanga a te Boys Brigade. Te pure nei te “Chaplain” ko Papa Laki Mave kia tupu te inangaro ki roto i te au tamariki e te au metua no te inangaro kia noo ki roto ia lesu Mesia no te oraanga kopapa e te oraanga vaerua no te aura ki mua.