Ko e Fai-Hoana mo e Fakaaue

Mana (Auckland), Volume 1, Issue 5, 1 September 1977, Page 6

Ko e Fai-Hoana mo e Fakaaue

Ko e aho Faiumu 13 ia Aokuso he hola 11 mogo pogipogi ne fakamau ai he Faifeau ko Pehalo Talagi a Felautusi, ko e tama taane a Togia Pahiva mo e l.aana Ikififine ko Epenesa, ki a Matamilino, ko e tama fifine a Lipaea lopu Togahai mo Tuiolo, mai Alofi Toga, Niue, ke he Fale Tapu he tau Aelani i Mangere. To lahi e mafola mo e fiafia he tau gahua he aho ti tokologa foki e tau mata kehekehe kua kitia ai ke he fakamauaga mo e fiafia ne hoko ai mogo fakamui. To tutaki atu e tala mogonei tuga he tohia mai he matua ko Pahiva. Ne amaamanaki au mo e manako lahi he haaku loto ke tohi e tala fiafia mo e fulufuluola hagaao ia ke he fakamauaga he tama taane ha maua ko Failautusi mo Matamilino. Fakamua, kua manatu au

ke vagahau ma e higoa he haaku a tokoua mo e fanau. magafaoa katoatoa mo laua foki kua fakamooli ai ke eke mo tino taha he moui tino nei. E, ha mautolu a tau loto kua pukenamo ai ke he fiafia mo e fakaaue mo e fakatulou kua nakai fai gata-mai-aga, he fakaheke atu ki a mutolu e tau lanu kehekehe, tau matakainaga, mo e tau kapisiga oti kua talia fiafia he ha mutolu a tau loto fakamooli ke fakalataha mai ke he fakamauaga he ha maua fanau ia. Fakaaue, fakaaue lahi makitogili atu ki a mutolu. Hanei foki, kua fa lagaloga ne tafetafe mai e tau hihina mata, mo e nakai hakohako foki e tau laugutu, ha ko e hofihofi he tau loto he momoko he logona kua hoko mai e tau mamatua he tama fifine ko Lipaea Togahai mo e haana loto fakavihi. Ko e kakano ni he tau momoko ia ko e fiafia lahi ati toka ai e tau

loto ka e nakai ko e tagi noa. Fakaaue lahi atu ki a mua ha ko e mamao e hala ne fenoga mai ai kua fakatau-kitia ai e lilifu mo e fulufuluola he fakamauaga he fanau ha tautolu. Hanei foki, kua nakai mukamuka ki a au ke fakafili mo e kitia ai e mitaki mo e kelea he aho ia. kae liga kitiae mutolu, kua nakai iloa foki e au e makona mo e hoge ha mutolu ma tau kapisiga. Ti kaeke ni kua fai mena kua nakai fuafua mitaki ki a mutolu, ti fakamolemole. fakamagalo mai ki a au. Ko e haaku a malolo ne amaamanakki ki ai kua nakai hokotia ha ko e tokoluga e fakafuaaga he mena ne higoa ko e TARO mai he tau Initia mo e tau Saina tuga ne fakamole e au ki ai ko e $790.00, 10 puaka ke he $550.00. $200.00 ne fakatau aki e tau moa, mo e loga foki he tau ika mo e tau mena kai kehekehe kua mole ki ai e falu

he tau tupe loga. Ko e $300.00 loki ne lakatau aki e kava. I i nakai ko e malolo ni haaku ka ko e tau malolo kaoa he magafaoa kua lagaki ki lugae lilifu ia ha ko e aga mo e mahani faka-Niue ke fe-mata-aki mo e fe lagomatai aki. Fakaaue lahi mahaki. Ko e tau tupe ne foaki mai e mutolu e tau uiina ko e $2,000.00 ti lafi atu ki ai e tau koloa kehekehe kua loga ue atu kua fakalata liga taha eale mo e maaga kaeke ke fakatupe. Liu fakaaue atu mo e fakatulou atu ki a mutolu oti mai he tau manatu kua fakamooli oti ki ai. Alikato, Alikato, Saina-La. Saina-La, Fakaaue, Fakaaue Lahi Mahaki! Ko au ko Togia Pahiva ma e higoa he haaku a loto fakavihi, fanau. mo e magafaoa.

Kua manako e MANA ma Felautusi mo Matamilino ke fakahoko atu foki ki a mua e amaamanakiaga ke monuina ha mua a tau aho ke nonofo ai fakalataha ko e hoana mo e taane, mo e amanaki foki ke monuina e fenoga ha mua ma Lipaea mo Tuiolo Togahai ka liliu atu ki Niue. Fakaalofa lahi age ke he tau takitaki hemotu mo Niue Katoa ka liliu hake a mua.