Tere apii

Mana (Auckland), Volume 1, Issue 5, 1 September 1977, Page 4

Tere apii

E toru mapu Kuki Airani i Nu Tireni i te ia aura nei. Tei raro ratou i Wellington i ko i te Victoria University. Na te Kavamani Kuki Airani ratou i akatika kia aere mai. Na te Columbo Plan ratou i tutaki mai. Tei ko nei ratou no te apii ia ratou kia maata mai te kite no te apiianga atu i ta tatou au tamariki i te Kuki Airani no runga i te tuatua Papaa. E maata tatou tei kite, e tei matau katoa ki taua au mapu nei. Ko to ratou au ingoa ta taou i matau i te kite ia ratou ko ia oki, ko Tere Mokoroa, ko Pare Browne, a ko Tapurau Tapurau. 1 roto ia Aukute nei no Akarana nei ratou i te Skarakara i te au apii tereni pu apii e tetai atu au apii ke no te akara i te au pu apii i te apiianga i te au tamariki kia kite meitaki i te tuatua Papaa. Kua oki atu ratou ki Wellington i te openga o Aukute. E tai mataiti te roa i ta ratou apii e ka oki atu ratou ki to tatou pa enua i roto i te marama ia Okotopa. Tetai mapu taurekareka tei aere mai ana ki konei e ko tei aere roa atu ki Singapore no runga i te apiianga no te tuatua Papaa na roto i te ratio, ko ia oki, ko Taoro Taia. Me oki mai a ia no reira, ka noo atu a ia ki Wellington no tetai

nga epetoma e rua, e me pou tei reira ka oki atu a ia i reira ki te Kuki Airani. Tei Nu Tireni nei katoa tetai au pu apii ta tatou i matau i te kite. Te akaoti nei i ta ratou au pepa apii no te au apii ngateiti. Ko Rangi Tuavera, tei Massey a ia, e e BA tana e aruaru nei. Ko Tere Tangaroa, tei Hamilton a ia, e e BA katoa tana e aruaru nei. E mea manea tikai, e e mea tau katoa kia akameitaki atu tatou ma te akamaroiroi ia ratou no te iaau angaanga meitaki ta ratou e rave nei, ei akangateitei rai i to tatou patireia meangiti. Te pure atu nei te Mana no ratou, kia manuia to ratou akakoroanga.